現代香港旅人視大遷徙是風景，看斑馬和牛羚逐水草雨露千里長征，卻遺忘了人人家裏一條南來香港的逃亡路線圖。過去50年，無數中國人逃避戰火、逃避批鬥、逃避飢荒，在國土上亂竄如畜牲，慌忙間流落香港這個臨時淨土的，其中一個就是倪匡，那些年吃老鼠、螞蟻和棉花充飢南逃的經歷，他沒有忘記。
「避共產黨係惟有移民㗎咋，到E家你有咩辦法呀？好似鍾祖康話來生不做中國人，我今世就不做中國人喇。」1992年，「仔大女大」的他展開人生第二次逃亡，目的地是美國三藩巿，共產黨魔爪未及的地方，「香港啲高官都走晒啦，政務司（林鄭月娥）一個咁大嘅官，可以老公仔女都喺外國，自己一個喺香港，你話佢想點樣？」
倪匡的邏輯很簡單，香港就是數人頭也數輸，「中國十幾億人都唔夠佢鬥，你話幾百萬武警公安喺度，你同佢鬥你點鬥呀？以前都話搵支木棍可以擋到佢，E家佢機關槍坦克你搵咩同佢打呀？」
他笑香港人自大，時常有幻想，「成日覺得自己好重要，喺中共嚟睇，700萬人好細之嘛，而且係少數抗共情緒激烈嘅人覺得大難臨頭之嘛，有啲仲去大陸發展事業㖭，去賺錢㖭，根本你一邊同強權統治咁緊密，一邊反對強權統治，係無可能嘅事嚟，你至少要好似印度甘地咁，至少要不合作，你一路合作得咁緊密，一路又要反對佢，人格分裂㗎嘛。」
在倪匡的詞典裏，香港人有兩種，一種是香港人，另一種是假香港人，後者是指近15年移民來港的內地人和自由行，「（單程證）一日150個人嚟，仲有派啲大陸學生嚟，家香港至少有30萬至40萬共產黨員喺度活動緊，動員力好強。爭取居港權嗰啲人天真到極，真係又天真又無邪，根本對共產黨唔理解，同共產黨講道理？同共產黨講信用？」
而自由行，不過是整個大佈局中的其中一步，「E家啲人歡迎自由行，好鍾意同共產黨做生意，好歡迎共產黨，唔覺得要反對，你由得佢哋嚟，咁共產黨對真正民意咪睇唔到囉，覺得我哋好鍾意囉。」
《蘋果》記者：張嘉雯
Reference: 觀戰台 – 被驅不異犬與雞
Filed under: Politics Tagged: 美國, 自由行, 鍾祖康, 香港, 倪匡, 共產黨, 張嘉雯, 中共, 中國, 來生不做中國人
